Username
Password
Remember Me
အဓိကသိထားရမည့်အချက်များ (Key facts)
Chikungunya ရောဂါပိုးကို အာဖရိကတိုက်ရှိ တန်ဇီးနီးယား နိုင်ငံတောင်ပိုင်းတွင် ကပ်ရောဂါအသွင်အဖြစ် ၁၉၅၂ ခုနှစ်၌ ပထမဦးဆုံးအကြိမ် သိရှိ သတိထားမိခဲ့ကြသည်။ ၎င်းသည် Togaviridae virus မိသားစုဝင်ဖြစ်ပြီး alphavirus အမျိုးအစားဖြစ်ပါသည်။ ၎င်း၏ နာမည် Chikungunya ကို ဒေသခံ Kimakonde ဘာသာစကားမှ တိုက်ရိုက်မွေးစားထားခြင်းဖြစ်ပြီး အဓိပ္ပါယ်အားဖြင့် “ပုံပျက်ပန်းပျက် ကွေးနေသည်” ဟု ခေါ်ရမည်ဖြစ်သည်။ ရောဂါဝေဒနာရှင်များအနေဖြင့် အဆစ်အမြစ်များ နာကျင်လွန်းသဖြင့် ကွေးနေရပုံကို တင်စားထားခြင်းဖြစ်ပါသည်။
ရောဂါလက္ခဏာများ (Signs & Symptoms)
အဆိုပါ ရောဂါဖြစ်ပါက အဖျားရုတ်တရက် ကြီးတတ်ပြီး အဆစ်အမြစ်များ တပြိုင်နက် ရောင်တတ်သည်။ တစ်ခြားလက္ခဏာတွေကတော့ ကြွက်သားများနာကျင်ခြင်း၊ ခေါင်းကိုက်ခြင်း၊ ပျို့အန်ခြင်းနှင့် အရေပြားတွင် အနီပြင်များထွက်ခြင်းတို့ ဖြစ်ပါသည်။ အဆစ်အမြစ်ကိုက်ခြင်းသည် ဆိုးဆိုးဝါးဝါးဖြစ်တတ်သော်လည်း ရက်အနည်းငယ်အတွင်းပြန်လည်သက်သာသွားတတ်သည်။ တစ်ခါတစ်လေတွင်တော့ လအနည်းငယ်တန်အောင်အထိ နာနေတတ်သည်။ တစ်ခါတစ်ရံတွင် မျက်စိကိုက်ခြင်း၊ အာရုံကြောအားနည်းခြင်း၊ ဗိုက်အောင့်ခြင်း နှင့် နှလုံးခုန်မမှန်ခြင်းတို့အထိ ဖြစ်နိုင်ပါသည်။ ဆိုးဝါးပြင်းထန်သည့် နောက်ဆက်တွဲရောဂါများ မ၀င်တတ်သော်လည်း အသက်ကြီးသူများတွင် အသက်သေသည့်အထိ ဖြစ်နိုင်ပါသည်။ မြန်မာနိုင်ငံတွင် အထက်ပါ ရောဂါလက္ခဏာများဖြင့် ဆေးခန်းသို့ သွားရောက်ပြသပါက ဆရာဝန် ၁၀၀ တွင် ၁၀၁ ယောက်က သွေးလွန်တုတ်ကွေး ဟု ရောဂါနာမည်တတ်မည် ဖြစ်သည်။ ထို့ကြောင့် မိမိဘက်မှလည်း ကြိုတင် သတိထားရမည်ဖြစ်သည်။
ရောဂါကူးစက်ပျံ့နှံ့ပုံ (Transmission)
Chikungunya ရောဂါသည် လူအချင်းချင်း ခြင်ကိုက်ခြင်းမှ တဆင့် ကူးစက်တတ်ပါသည်။ ရောဂါပိုးသယ်ဆောင်သော ခြင်များမှ Aedes aegypti နှင့် Aedes Albopictus တို့ဖြစ်ပါသည်။ အဆိုပါ ခြင်မျိုးစိတ်များသည် သွေးလွန်တုတ်ကွေးရောဂါပိုးကိုလည်း သယ်ဆောင်နိုင်ပါသည်။ အဆိုပါခြင်များသည် နေ့အချိန်တွင် အဓိက ကိုက်လေ့ရှိပြီး နံနက်စောစောပိုင်းတွင် အကိုက်ဆုံးဖြစ်ပါသည်။ အိမ်အတွင်းတွင် ကော အိမ်၏ အပြင်ဘက်တွင် ပါ ကျက်စားနေလေ့ရှိပြီး အလင်းရောင်နည်းသည့်နေရာများတွင် ပုန်းခိုနေလေ့ရှိကြသည်။ ရောဂါပိုးကို သယ်ဆောင်သည့် ခြင် အကိုက်ခံရပြီးပါက လေးရက်မှ ရှစ်ရက်အတွင်း ရောဂါလက္ခဏာများ ပေါ်လာတတ်ပါသည်။
ရောဂါနာမည်တတ်ခြင်း (Diagnosis) နည်းအမျိုးမျိုးရှိသော်လည်း အကောင်းဆုံးမှာ ELISA method ဖြင့် IgM ကို ရှာသည့်နည်းဖြစ်ပါသည်။ IgM ဆိုသည်မှာ ဒီ Chikungunya ရောဂါပိုး ကို တိုက်ဖျက်ရန်အတွက် ခန္ဓာကိုယ်မှ ထုတ်လွတ်သည့် antibody တစ်မျိုးဖြစ်ပါသည်။ ၎င်း antibody သည် ရောဂါပိုးဝင်ပြီး နှစ်လအထိ တက်နေတတ်သောကြောင့် အဆိုပါ နှစ်လအတွင်း စစ်ဆေးနိုင်ပါသည်။ မြန်မာနိုင်ငံတွင် အမျိုးသားဓာတ်ခွဲခန်း (National Health Laboratory) ၌ မည်သူမဆို စစ်ဆေးခွင့် ရှိပါသည်။ ဆရာဝန်များမှတဆင့် မေးမြန်းစုံစမ်းနိုင်ပါသည်။
ရောဂါကုသပုံ (Treatment)
Chikungunya ရောဂါပိုးကို သေစေနိုင်သည့် ဆေး မပေါ်သေးပါ။ ကာကွယ်ဆေးလည်း မရှိသေးသောကြောင့် ရောဂါလက္ခဏာများ သက်သောအောင်သာ ဆေးကုသပေးနိုင်သေးပါသည်။ ကာကွယ်ခြင်းနှင့် ထိန်းချုပ်ခြင်း (Prevention & control)
ရောဂါကို ကာကွယ်ရန်အတွက် ခြင်များပေါက်ပွားနိုင်သည့် နေရာများကို ရှာဖွေဖျက်ဆီး ရမည်ဖြစ်သည်။ အိမ်အနီးတ၀ိုက်ရှိ တာယာဟောင်းများ၊ ခွက်ဟောင်းများတွင် ရေများတင်ကျန်နေပါက သွန်ပစ်ရမည်ဖြစ်သည်။ သွေးလွန်တုတ်ကွေးခြင်နှင့် တူသောကြောင့် သွေးလွန်တုတ်ကွေးကို ကာကွယ်သကဲ့သို့သာ လုပ်ဆောင်ရမည်ဖြစ်သည်။ ရေမြောင်းများပိတ်ဆို့နေပါက ရေစီးရေလာကောင်းအောင် ပြုလုပ်ပေးရမည်ဖြစ်သည်။ အိမ်ရှိ ရေအိုး ရေတိုင်ကီတို့ကို ဖုံးအုပ်ထားရမည်။ ဘုရားပန်းအိုးများကို ပုံမှန် လဲပေးရမည်ဖြစ်သည်။ အိမ်တွင် အလင်းရောင် ကောင်းစွာရအောင် ပြုလုပ်ထားရမည်ဖြစ်သည်။ ခြင်ကိုက်ခြင်းမှ ကာကွယ်ရန်အတွက် ဆေးများလိမ်းနိုင်သလို ဆေးရည်စိမ်ခြင်ထောင်များကို အသုံးပြုသင့်ပါသည်။ အထူးသဖြင့် ကလေးများနှင့် အသက်ကြီးသူများ နေ့ခင်းနေ့လည် အိပ်စက်ပါက ခြင်ထောင်ဖြင့် အိပ်သင့်ပါသည်။ မြန်မာနိုင်ငံ၏ လက်ရှိအခြေအနေ
ရန်ကုန်တွင် ပြီးခဲ့သည့် နှစ်လအတွင်း ရောဂါတော်တော်လေးဖြစ်လိုက်သည်။ NHL သို့ မရောက်စဖူး sample တွေ အမြောက်အများရောက်လာသည်ကိုတွေ့ရသည်။ ဒါတောင် diagnosis မရဘဲ လွတ်သွားသူတွေ ဘယ်လောက်တောင် ရှိမလဲမသိရပါ။ ထိုင်း- မြန်မာနယ်စပ်မှ တဆင့် ကူးစက်ဝင်ရောက်လာသည်ထင်ပါသည်။ ထိုင်းတွင်လည်း 2009 ခုနှစ် ပထမ ခြောက်လအတွင်း လူ ၂၂,၀၀၀ ကျော် ကူးစက်ခံရပြီး သေဆုံးသူအရေအတွက်ကိုတော့ ကျန်းမာရေးဝန်ကြီးဋ္ဌာနက မကြေငြာပါဘူး။ မလေးနဲ့ ထိုင်းနယ်စပ်မှလည်း အဖြစ်များနေတယ်။ စင်ကာပူများလည်း မကြုံစဖူး ဖြစ်ပွားနေတယ်လို့ သိရပါတယ်။ နှစ်ကုန်ရင်တော့ မြန်မာပြည်မှာ ဘယ်လောက် case အရေအတွက်ရှိလည်း ဆိုတာ သိရမည်ထင်ပါတယ်။
Reference
WHO: Chikungunya
Tags: Aedes, Chikungunya, ELISA, WHO
Copyright © 2009 --- Webdesign aus Tirol - All Rights Reserved. Template Demo Joomla 1.5 Template by pc-didi..
Webdesign aus Tirol designed by PC-DIDI.
